+19 °С
Облачно
Фекер
30 Октября 2022, 05:40
Алмаштырғыһыҙ кеше булмай
Алмаштырғыһыҙ кеше булмай, тиҙәр. Был дөрөҫмө?Ни тиклем шәп кеше, ни тиклем үҙ эшеңдең оҫтаһы булма — һине алмаштырғандай берәү барыбер табыласаҡ. Әлбиттә, бер аҙ ҡыйын булыр, иҫләп-һағынып алырҙар, шулай ҙа урыныңа берәйһен табырҙар. Ер йөҙөндә миллиардлап кеше йәшәй һәм улар араһында һинән башҡа ла бынамын тигән белгестәр быуа быумалы. Тормош, эш, йәмғиәт шулай ҡоролған: берәүҙе алмаштырырға икенсеһе көтөп кенә тора.Үлеп-нитеп китә ҡалһаң, алмашты тағы ла тиҙерәк табалар, сөнки көтөр кеше юҡ. Кешеләр ҙә, тәбиғәт кеүек, бушлыҡты яратмай, уны тиҙерәк тултырыу сараһын эҙләй: быға тиклем һин башҡарған эштәрҙе кемгәлер йөкмәтә һалырға кәрәк.
Алмаштырғыһыҙ кеше булмай
Шулай ҙа ҡайһы берәүҙәргә һинһеҙ ҡыйын буласаҡ. Атай-әсәйеңә, мәҫәлән, балаларыңа, һине берҙән-бере итеп һөйгән яртыңа... Бына шуны бер ҡасан да оноторға ярамай!
Атайымдың кабинетында хәҙер икенсе доктор ҡабул итә. Минең атайым юҡ шул инде. Ә бит ул эш тип өҙөлдө, үҙен әрһеҙләне, коллегалары ла аяманы – табиптарҙы ғөмүмән берәү ҙә йәлләп тормай. Ә үлеп киткәйне, урынына шунда уҡ икенсе кешене табып та ҡуйҙылар. Бына шулай, бөтәбеҙгә лә алмаш табыла, беҙ булмаһаҡ та, донъя үҙ яйы менән тәгәрәп китеп кенә бара...
Ә бына иң яҡын кешеләрең, хатта этең менән бесәйең, һине ғүмерлеккә юғалта. Уларға һинһеҙ ныҡ ҡыйын. Сөнки һине башҡа берәү менән дә алмаштыра алмайҙар. Ғүмерлек юғалтыу менән килешергә генә ҡала. Юҡ ундай кеше, башҡа булмаясаҡ... Шуға үҙегеҙҙе яҡындарығыҙ өсөн һаҡлағыҙ тип әйткем килә.
Анна Кирьянова.
Рәхимә Мусина тәржемәһе.
👆Зөһрә йондоҙ төркөмөнән
