Һауа торошон күҙәтәләр

Ҡаланың “Аленушка” балалар баҡсаһында метеостанция барлыҡҡа килде. Ул мәктәпкәсә йәштәге балалар учреждениеһы биләмәһе уртаһында урынлашҡан. Кескәйҙәр бында күп нәмәне танып белә: һауа температураһын, атмосфера баҫымын үлсәй, елдең йүнәлешен билдәләй, яуам-төшөмдө күҙәтә. Уларға айырыуса тәҙрәлә болотто тотоу процессы оҡшай. Ҡатлы-ҡатлы, өйөрмәле, ауыр болоттарҙың торошон билдәләргә махсус карта ярҙам итә. Станцияла балалар тирә-яҡ мөхиттең серҙәренә төшөнә, тәбиғәтте һаҡларға һәм уның торошон күҙәтергә өйрәнә. Яңылыҡҡа балалар менән ҡуша педагогтар ҙа, ата-әсәләр ҙә һөйөнә.

--Беҙҙең күптәнге хыялыбыҙ тормошҡа ашты: балалар баҡсаһы биләмәһендә өр-яңы метеомайҙансыҡ барлыҡҡа килде. Бындай мөмкинлеккә урындағы башланғыстарҙы яҡлау программаһында ҡатнашып конкурста еңеп сығыу һөҙөмтәһендә ирештек. Хәҙер балалар тышҡа уйнарға сыҡҡанда төрлө ҡоролмалар ярҙамында һауа торошон, тирә-мөхиттең үҙгәрешен күҙәтә, -- ти инициатив төркөм рәйесе Элина Шаһиғәлина.

Метеостанция барлыҡҡа килгәндән алып кескәйҙәрҙең тирә-яҡ мөхитте танып белеүгә, тикшеренеүҙәр уҙғарыуға ҡыҙыҡһыныуы артҡан. Хәҙер улар балалар баҡсаһына уйнарға түгел, күҙәтеүҙәр һәм эскперименттар аша яңы асыштар яһар өсөн ашҡынып бара.

Фото Сибай телевидениеһы төркөмөнән.