Сибайҙан 16-сы гуманитар ылау ҡуҙғалды

Был юлғы ылауға сибайҙар һәр ваҡыттағыса аҙыҡ-түлек, гигиена кәрәк-ярағы, яугирҙәргә шәхсән посылкалар тейәне. Бөтәһе 20 тонна йөк йыйылған ине. Ҙур машинаға иң беренсе ҙур әйберҙәр, шул иҫәптән 2 еңел автомобиль тейәлде,- тине Сибай ҡала хакимиәтенең иҡтисади үҫеш һәм инвестициялар буйынса бүлеге начальнигы Яна Хәлисова.

Ҡала халҡы шулай уҡ яугирҙәргә маталл рәшәткәләр, транспортерлы лента, шиналар, госпиталгә бер тапҡыр ҡулланыла торған һауыт-һаба, һауа таҙартҡыс, эсәр һыу, окоп шәмдәре ебәрҙе.

Гуманитар ылауҙы тейәргә ҡаланың уҡыу йорттары студенттары ҙур ярҙам күрһәтте.

Гуманитар ылау ебәреүҙә ҡатнашыу һәр кемдең изге бурысы. Алғы һыҙыҡтағы ир-егеттәргә бындай ярҙам тыуған яҡ сәләмен, күстәнәсен илтеп кенә ҡалмай, артабан арыу-талыу белмәй дошманға ҡаршы торорға көс-дәрт тә бирә. Ирекмәндәр фронтҡа ярҙам итеүҙән туҡтағаны юҡ. Күп кенә урындарҙа маскировкалау селтәрҙәре үрелә, хужабикәләр консерва, ҡайнатмалар яһай, балалар иһә тиҙерәк еңеү менән әйләнеп ҡайтығыҙ тип хаттар яҙа.