Бәрсәк йыйыны гөрләне

Баймаҡ районының Йәнйегет ауылына 1816 йылда Таулыҡай кешеләре нигеҙ һалған. Тәүге нигеҙ һалыусы зауряд-сотник Йәнйегет Таулыҡаев исеме менән йөрөтәләр. Икенсе йыл ауылдың 210 йыллығы билдәләнәсәк. Шуға әҙерлек маҡсатында кисә үҙебеҙҙең ара- Бәрсәк йыйынын үткәреп ташланыҡ. Әҙерлек ғәләмәт ихлас барҙы.Шуға йыйындың юғары кимәлдә үткәнлеге аңлашылып тора.Әбсәләм һаҙының матур ғына Өтөлгән тигән урынында, Фаил йәйләүендә, таңдан ҡаҙандар аҫылды, самауырҙар ҡуйылды. Ҡунаҡтарҙы тәмле генә төтөн еҫе ҡаршы алды. Өҫтәлдәр татлы ризыҡтарҙан һығылып торҙо, туғандарҙың осрашыу шатлығынан йөҙҙәре балҡыны, күрешеүҙәр, һөйләшеүҙәр, шатлыҡлы күҙ йәштәре.Ойоштороусы йәштәребеҙ шәп беҙҙең, һәр береһе үҙ эшен яуаплы башҡарҙы. Гөлназ, Аида, Айгөл бикәстәрем, Салауат, Рөстәм ҡәйнештәрем, үҙемдең балам, уларға ярҙам иткән бүтән балаларыбыҙ - барыһы ла афарин инде! Телдәренән дә, ҡулдарынан да килә! Беҙгә, өлкәндәргә, уларға эйәреп ҡыймылдау еңелерәк булды. Йәштәр килһә, эш башлай, ололар килһә, һүҙ башлай тигәне ысын икән.Тәмле аш, сәй, матур уйындар, ярыштар, йыр-бейеү менән шәп үтте йыйын. Икенсе йыл үтәсәк ауыл байрамына маҡсаттар ҡуйылды.Туғанлыҡ ептәрен һаҡлау- Аллаһ Тәғәлә тарафынан йөкмәтелгән аманат! Балалар яҡындан танышты, туғанлашты, ололар уларҙың һорауҙарына яуап эҙләне, тарих төпкөлдәренә төштө. Барыһы ла булды. Бүләк биреү - матур йола, унһыҙ ҙа булмай бит инде. Бар ҡунаҡтар ҙа ҡыуанып ҡайтҡандыр, тип ышанам.Был йыйынға килгән, ҡатнашҡан, мәжлесте күтәргән, килә алмаһа ла, йылы сәләмен ебәргән туғандарҙың барыһына ла рәхмәт!Ә ойоштороусыларға ҙурҙан 5!

Бәрсәк йыйыны гөрләне