+24 °С
Ямғыр
Байрамдар
18 Июнь 2025, 12:05
Балалар әкиәт һөйләне
Өфө ҡалаһының Совет майҙанында Китап байрамы уҙҙы. Халыҡ-ара йәрминкәлә Рәсәй төбәктәренән һәм башҡа дәүләттәрҙән ҡатнашыусылар йыйылды. 3 көн дауамында барған саралар Бөйөк Ватан һуғышы һәм махсус хәрби операцияға арналды. Халыҡ-ара китап йәрминкәһе сиктәрендә «Һаумы, һаумы, әкиәт!» донъя халыҡтары әкиәттәрен йәш башҡарыусыларҙың төбәк-ара конкурсында еңеүселәрҙе тәбрикләү тантанаһы уҙҙы. Башҡортостан халыҡтарының туған телдәрен һаҡлауҙы, әкиәт башҡарыу традицияларын үҫтереүҙе маҡсат итеп ҡуйған конкурста Сибай ҡалаһының балалар баҡсалары тәрбиәләнеүселәре һәм мәктәп уҡыусылары уңышлы сығыш яһаны. 8-се мәктәптең 2-се класс уҡыусыһы Милена Ҡыҙрасова рус телендә «Теремок» әкиәтен һөйләп гран-при яуланы. Ҡыҙҙы ярышҡа уҡытыусыһы З.Х.Ишбирҙина әҙерләгән. Бәләкәстәр араһында «Төлкө балаһы» әкиәтен һөйләүсе «Ҡарһылыу» балалар баҡсаһы тәрбиәләнеүсеһе Карина Вәлиуллина 3-сө урынға өлгәште. Тырыш ҡыҙ менән уҡытыусы-логопед Г.Б.Урмантаева шөғөлләнгән.
Балалар әкиәт һөйләне
Конкурстың «Сәхнәләштерелгән әкиәт» номинацияһында «Айгөл» балалар баҡсаһының фольклор коллективы 2-се урынға лайыҡ булды. Бәләкәстәр «Шишмә» әкиәтен ҡуйып барыһында таң ҡалдырған. Йәш артистарҙы ярышҡа балалар баҡсаһының музыкаль етәксеһе В.Ф.Әхмәтшина, тәрбиәселәр Г.Ю.Байғужина, Ю.В.Зарипова, Р.И.Кәримова әҙерләгән.
«Ғаилә фольклор коллективтары» номинацияһында «Ҡурай» балалар баҡсаһы исеменән сығыш яһаған Яхиндар, Сәғәҙәтовтар, Биктимеровтар ғаиләләре 3-сө урын алды. Ғаиләләргә тәрбиәсе Г.З.Хасаева ярҙам иткән. Шулай уҡ Әмирова Ләйсән Хәдит ҡыҙы конкурста жюри ағзаһы булараҡ күрһәткән профессиональ хеҙмәте өсөн Мәғариф һәм фән министрлығының Рәхмәт хаты менән бүләкләнде.
Конкурста Сибай ҡалаһы намыҫын күтәреп, юғары уңыштарға өлгәшкән бәйгеселәрҙе, уларҙы ярышҡа етди әҙерләгән уҡытыусыларҙы, тәрбиәселәрҙе, музыкаль етәкселәрҙе ҡотлайбыҙ! Гел шулай алдынғы булығыҙ!
Гөлдәр Ҡадаева.
