Юлдарығыҙ хәйерле булһын!

Сибай концерт-театр берекмәһе артистары водителдәре Азат Иҙрисовты “беҙҙең Азат ағай” тип кенә тора. Сөнки төп сәхнәлә сығыш яһауҙан тыш улар күпселек осраҡта гастролдәрҙә йөрөй. Юл хәлен белеп булмай, шуға ла хеҙмәткәрҙәр водителдәрен күҙ ҡараштарынан уҡ аңлап, уға ышанып транспортҡа ултыра һәм республика ғына түгел, унан ситкә лә сығып китә. Азат Иҙрисов мәҙәниәт усағында тиҫтә йылға яҡын эшләй. Татарстандың Яр Саллы ҡалаһында водитель танытмаһы алғандан һуң ул КамАЗ заводында өр-яңы автомобилдәрҙе тикшереп ҡараусы булып эшләй. Сит ерҙәрҙе үҙһенмәй тыуған яғына ҡайтҡас, оҙаҡ йылдар Сибай АТП-һында дежур автобусты йөрөтә. 40 йылға яҡын эш стажы һәм асыҡ категориялы водителгә Сибай концерт-театр берекмәһе етәкселеге барлыҡ транспортын да ышынып тапшыра. Күпселек осраҡта яңы, ҡеүәтле, уңайлы шарттары булған сит ил автобусында артистарҙы гастролдәргә йөрөтә. Күптән түгел өлөшләтә мобилизация башланғас ул ир-егеттәрҙе Ҡазанға, Һарытауға ла алып барған. Бөтә илгә таралған видеояҙмала “Шайморатов генерал” йырын йырлаусы ир-егеттәр тап уның автобусында китеп бара.

Техниканы яҡшы белгән Азат ағайҙың донъяһы ла ялт итеп тора, Алтын ҡасабаһында ике ҡатлы йорт һалып ингән. Ул өйөндә зауыҡты үҙе булдыра, күҙҙең яуын алырлыҡ бүлмә гөлдәре, ишек алдында раузалар үҫтерә.Ҡатыны Гөлсирә Ғәйнислам ҡыҙы менән 31 йыл ғүмер итәләр. Улдары Дим һәм килендәре Гөлназ Азатовтар үҙ эшен булдырған. Халыҡ яратып эскән милли эсемлек—буҙа етештерә улар. Ҡыҙҙары Линара кейәүҙә, Яр Саллы ҡалаһында йәшәй. Иҙрисовтарҙың төп байлыҡтары—ейән-ейәнсәрҙәре Инсар, Мәликә, Булат һәм Сабир. Шуларҙың һәр уңышына ҡыуанып, шуларҙы яратып, баҡса үҫтереп, ҡош-ҡорт аҫрап йәшәйҙәр.

Автор:Гульдар Кадаева