ЯҢЫ ЙЫЛ КИЛӘ!

Республикала Яңы йыл майҙансыҡтары декабрь башында асылырға тейеш. Был халыҡта байрам кәйефе уятыу маҡсатында эшләнә.

Сибай ҡалаһы майҙанына өсөнсө йыл рәттән пикселле шыршы урынлаштырыла. Иҫегеҙгә төшөрәбеҙ: ул республика бүләге.

15-20 йыл элек байрамдың төп атрибуттары боҙ һындар, ҡар өйөмдәренән эшләнгән тауҙар ине. Хәҙер ҡыш һуңлап һәм сюрприздар менән килә: йә ҡар яумай, йә ҡапыл йылытып ебәрә. шуға боҙ табыуы ла ауырлаша, һындар эшләү ҙә еңелдән түгел. Тимәк, заманға яраҡлашырға ҡала. Шуға ла һәр төрлө сағыу, балҡып торған арт-объекттар булдырыла.

Сибайҙа Үҙәк майҙанға ғына шыршы ҡуйылмай. Ситтә ятҡан биҫтә-ҡасабаларҙа, Башҡорт лицейы биләмәһендә, мәҙәниәт һәм ял паркында ҡупшыҡай буласаҡ. Халыҡ һорауы буйынса, яңыртылған М.Ғафури паркына ла шыршы ултыртыу планлаштырыла.

Байрам фейервергы мотлаҡ буласаҡ! Сағыу уттар өс нөктәлә балҡыясаҡ.