Тура трансляция буласаҡ

Кисә респубулика Хөкүмәтендә үткән кәңәшмәлә Бөйөк Еңеүгә 76 йыл тулыуҙы билдәләү сараһына әҙерлек тикшерелде.

-- Коронавирусҡа бәйле, ябыҡ биналарҙа күп саралар үтмәй. Байрамды асыҡ һауала санитар-эпидемиологик нормаларға таянып ҡына билдәләйбеҙ, - тине республика Башлығы.

Премьер-министр урынбаҫары Ирек Сәғитов әйтеүенсә, 9 май Өфөлә тантаналы сара үтә. Сәғәт иртәнге 10 -да Октябрь проспектынан хәрби техника уҙа. Бөтә ҡатнашыусылар битлектә буласаҡ. Саҡырылыусы ветерандарҙан коронавирусҡа тест аласаҡтар һәм шәфҡәт туташтары, ирекмәндәр оҙатыуында айырым транспортта алып киләләр. Байрам сараһын БСТ, "Башҡортостан -24", "Вся Уфа" телеканалдары тура трансляцияла күрһәтә.

- Онлайн форматта үтәсәк "Үлемһеҙ полк" акцияһында республика халҡы әүҙем ҡатнаша. Был тәңгәлдә Башҡортостан лидерҙар рәтендә. 87 мең кеше үҙ геройҙары фотоһүрәтен ебәргән дә инде. Был бик яҡшы күрһәткес, - тип халыҡтың патриотик тойғоһона юғары баһа бирҙе Радий Хәбиров.