Уңғандарҙың эше лә уң

Сибай водоканалы предприятиеһының һыу бүлеү цехы начальнигы Фәнүр Фәрит улы Мәҡсүтов йәмғиәттә 2000 йылдан алып эшләй. Авария эҙемтәләрен тергеҙеү эштәре бригадаһында слесарь булып хеҙмәт юлын башлаһа, аҙаҡ бригадир, мастер вазифаларын да башҡарған.

—2016 йылдан һыу бүлеү цехын етәкләйем. Ҡырҡтан ашыу кеше эшләгән цех ҡаланың таҙартыу ҡоролмаларын, канализацияны һурҙыртыу станцияһын, канализация селтәрҙәрен хеҙмәтләндерә,—ти цех начальнигы Фәнүр Фәрит улы, эштәре тураһында бәйән итеп.—Коллектив татыу. Оҙаҡ йылдар намыҫлы хеҙмәт иткән компрессор ҡоролмалары машинисы Э.В.Медведев, икенсе отстойниктар операторы Ш.Ш.Тулыбаева, һурҙыртыу ҡорамалдары машинисы Ә.Р.Алтынбаева, иретеп йәбештереүсе Р.С.Мәҡсүтов, пульт менән идара итеү операторы Г.Ф.Байназарова йәштәргә өлгө булып тора.

Маҡтаулы етәксе Фәнүр Мәҡсүтов “Егет кешегә етмеш төрлө һөнәр ҙә аҙ” тигән халыҡ мәҡәленә таянып эш бирә. Һәр ваҡыт белемгә, яңылыҡҡа ынтылыуы ла уға үҫеш баҫҡысына үрләргә булышлыҡ итә. Ул иретеп йәбештереүсе, ташсы-монтажсы һөнәрҙәренән тыш, Өфө яғыулыҡ-энергетика колледжын тамамлап, техник-газсы белгесе дипломын да алған.

Әлеге көндә Фәнүр Ырымбур дәүләт университетында сәнәғәт-граждан төҙөлөшө факультетында ситтән тороп белемен камиллаштыра.

Ф.Ф.Мәҡсүтов хәләл ефете Миләүшә Фәхретдин ҡыҙы менән Арҡайым ҡасабаһында шәхси йорт һалып сыҡҡан. Өлкән улдары Илнар Өфө авиация техникумын тамамлап, әлеге мәлдә Приморье крайында әрме хеҙмәтен үтә. Ҡаланың 9-сы лицейында белем алған Данил менән Линара ағаларының армиянан ҡайтыуын түҙемһеҙләнеп көтә. Мәҡсүтовтарға һаулыҡ һәм именлек теләйбеҙ.