Заманса ҡорамалдар дауалау сифатын арттыра

Башҡортостан Башлығы Радий Хәбиров социаль йүнәлешкә бик ҙур иғтибар бүлә, айырыуса һаулыҡ һаҡлау өлкәһе өҫтөнлөклө йүнәлештәрҙән һанала.
– Беҙҙең алдыбыҙға ҙур һәм изге маҡсаттар ҡуйылған, уларҙың һәр береһен тормошҡа ашырыу өсөн ҙур аҙымдар яһайбыҙ,--тип белдерә Башлыҡ.
«Һаулыҡ һаҡлау» милли проектының «Башҡортостан Республикаһында сәләмәтлекте тергеҙеү өсөн оптималь реабилитация медицинаһы» төбәк программаһына ярашлы Сибай үҙәк дауаханаһына 2 массаж өҫтәле, шулай уҡ Sonopuls 492 аппараты (электротерапия + УЗТ) ҡайтарылды. Заманса медицина ҡорамалдарын һатып алыуға аҡса республика ҡаҙнаһынан бүленгән.
Өс секциянан торған массаж өҫтәлдәре пациентҡа ла, медицина хеҙмәткәренә лә манипуляцияларҙы башҡарыу өсөн бигерәк уңайлы. Баш, аяҡты кәрәкле кимәлгә ҡәҙәр күтәреп, төшөрөп була.
.Sonopuls 492 аппараты эффектлы терапиялы юғары технологиялы ҡорамал. Уның электротерапия һәм ультратауыш технологияһын үҙ эсенә алыуы далалау процессын сифатлы итә һәм тиҙәйтә.
✅-Дауаханабыҙ туҡтауһыҙ яңы, заманса медицина аппараттары менән тулыланып тороуы дауаланыуҙың сифатын күтәрә. Юҡҡа ғына Сибай үҙәк дауаханаһында тотош Урал аръяғы халҡы хеҙмәтләндерелмәй: бында һаулыҡты нығытыу, дауаланыу өсөн бөтә уңайлы шарттар ҙа бар,--ти йәмәғәт фекере лидеры Роза Бикбова.