Һиндостан студенттары--Йылайырҙа

Стажировка барышында студенттар Йылайыр дауаханаһында эшләүсе өлкән коллегаларының эш тәжрибәһен өйрәнә. Буласаҡ табиптар үҙ сиратында Йылайыр медиктарына инглиз телен өйрәнеүҙә ярҙам итә. Әйткәндәй, бындай форсат менән һәр бер теләүсе ҡуллана ала. Инглиз теле буйынса бушлай курстар үтергә теләүселәрҙе көндөң беренсе яртыһында район поликлиникаһының ултырыштар залында көтәләр.

Һиндостан студенттары өсөн халҡыбыҙға хас ҡунаҡсыллыҡ, ихласлыҡ менән көн һайын бер матур сара әҙерләп күрһәтелә. Районға килгән тәүге көндәрендә үк йәштәр менән район хакимиәте башлығы Борис Мелкоедов менән осрашҡан. Башҡорт гимназияһының инглиз теле уҡытыусылары менән берлектә район тарихты өйрәнеү музейына, Сауҙагәрҙәр урамы буйлап экскурсия ойошторолған.

–Белеүебеҙсә, Һиндостан менән Башҡортостан Республикаһы араһында күптән инде дуҫлыҡ ептәре нығынған. Беҙҙең стажировка программаһы ла Башҡорт дәүләт медицина университеты һәм Һиндостандың медицина учреждениелары араһындағы халыҡ-ара бәйләнеште тағы ла яҡшыртыуға етди аҙым. Бынан тыш, тыуған районыбыҙҙың туристик йәлеп итеүсәнлеген күтәреүгә булышлыҡ та итәсәк,--ти Йылайыр үҙәк район дауаханаһының баш табибы Данис Ғәлин.

К.Ишбулдина.