+9 °С
Ясно
Һаулыҡ һаҡлау
30 Ноября 2022, 07:10
Бөйөр, бәүел ҡыуығындағы ташты онтайҙар
Сибай үҙәк дауаханаһында тәүге тапҡыр лазерлы цистолитотрипсия—бөйөр, бәүел ҡыуығындағы һәм һейлек юлындағы таштарҙы лазер ярҙамында онтау һәм алыу буйынса операцияһы яһала башланы. Дауахананың хирургия бүлегенә “Fiber Lase U2” бөйөр, бәүел ҡыуығы һәм һейлек юлына контактлы литотрипсия уҙғырыу өсөн инновацион лазер аппараты урынлаштырылған. Заманса медицина ҡорамалы финанс ҡуртымы (лизинг) шарттарында, йәғни учреждение эшмәкәрлегенә килем килтереү иҫәбенә һатып алынған. Яңы аппаратта тәүге операцияны эсе, биле ауыртыуға зарланған иргә яһағандар. Тикшеренеү барышында уның бәүел ҡыуығында ҙур таш булыуы асыҡланған. 28 ноябрҙә уға уролог С.А.Иноятов һәм хирургия бүлеге мөдире Л.А.Ҡыҙрасов лазерлы цистолитотрипсия операцияһы яһаған.
Бөйөр, бәүел ҡыуығындағы ташты онтайҙар
Операция барышында таш тулыһынса онталған. Сирле хәҙер үҙен яҡшы тоя, элекке ауыртыныуҙары юҡҡа сыҡҡан. 2 көндән ул дауахананан сығарыла.
-Һуңғы арала төбәктә бөйөр, бәүел ҡыуығы, һейлек юлдарында таш булыуға зарланыусылар бик күп. Органдарҙағы ташты лазер менән онтау кеше организмын артыҡ тарвмаламаған алым. Тәнде, органды ҡырҡып операция яһауға альтернатива булыуы менән дә отошло,--ти хирургия бүлеге мөдире Линар Алик улы. -Дистанцион литтрипсия, конкременттарҙы башҡа төрлө сығарыу алымдары менән сағыштырғанда контактлы алымдың бер нисә ыңғай яғы бар: өҙлөгөү минималь процент, реабилитация ваҡыты бик ҡыҫҡа, операциянан һуң урыны ауыртып йонсотмай, инструменттар ағзаларға тәбиғи юл менән индерелә, шул рәүешле тән ҡырҡылмай, яралар булмай. Пациенттар өсөн өҫтөнлөктәре: стационарҙа оҙаҡ ятмайҙар, рецидивтар булмай.
Процедура табип йүнәлтмәһе буйынса һәм бушлай үткәрелә.
Бәүел ҡыуығына, бөйөрөгөҙгә бәйле проблемаларығыҙ бар икән поликлиника регистратураһы аша урологҡа яҙылырға кәрәк. Урологтар Н.Я.Шатов 416 кабинетта көндә иртәнге 8.00 сәғәттән 15.30 ҡәҙәр, С.А.Иноятов көндә 14.00-16.00 сәғәттәрҙә ҡабул итә.
