Дистанцион уҡыуға күсәсәктәр

Башҡортостан башлығы Радий Хәбиров Мәғариф министрлығына мәктәптәрҙә уҡыған хроник сирле балаларҙы ваҡытлыса дистанцион уҡыуға күсереп тороу юлдарын ҡарарға тәҡдим итте. Әлбиттә, балалар өйҙә уҡытыуға ата-әсә рөхсәте менән генә  күсереләсәк.

—Быйыл 1 сентябрҙә 500 меңгә яҡын балаға мәктәптәр үҙ  ишектәрен асасаҡ. Уларҙың 58 меңе тәүге тапҡыр мәктәп тупһаһына аяҡ баҫасаҡ - 1-се класс уҡыусылары.  Санитар-эпидемиологик хәлгә килгәндә дөйөм мәктәп менән дистанцияла уҡыуға күсеүгә нигеҙ юҡ. Тик коронавирус  ауырыуы бик зәһәр, беҙгә төрлө хәлдәргә әҙер булырға кәрәк, -тине республика башлығы.

1 сентябрҙә һәр мәктәптә байрам линейкалары асыҡ һауала ғәҙәттәгесә үтәсәк. Бында байрам сараһын бер нисә блокка бүлеп үткәрергә ҡарар ителде. Бер блокта ҡатнашыусылар һаны 200-ҙән артмаҫҡа тейеш. Ата-әсәләрҙән битлектәре булғандар, бар санитар нормаларҙы үтәгәндәр генә индерелә.