Ҡомалаҡтың файҙалы булыуын күптәр беләлер. Шулай ҙа беҙ уны тағы бер ҡат иҫегеҙгә төшөрөргә теләйбеҙ.
- Әгәр йоҡоһоҙлоҡ йонсотһа, тынысланырға теләһәгеҙ, “ҡомалаҡ сәйе” әҙерләгеҙ. 1 сәй ҡалағы ҡомалаҡҡа бер стакан ҡайнар һыу ҡойорға һәм 15-20 минут төнәтергә. Көнөнә 2 тапҡыр 70-100 грамм эсегеҙ. Йоҡлар алдынан эсеү мотлаҡ. Ҡомалаҡтан яҫтыҡ эшләп алһағыҙ, йоҡоғоҙ тағы ла “тәмлерәк” булыр.
- Радикулит йонсотһа, ҡомалаҡтан дауа эшләп алырға мөмкин. 1 аш ҡалағы ҡомалаҡҡа 200 мл һыу ҡойорға, талғын утта һыу ике тапҡырға кәмегәнсе ҡайнатырға. Унан 1 аш ҡалағы әлеге төнәтмәгә 4 аш ҡалағы вазелин ҡушығыҙ ҙа һыҙлаған, ауыртҡан, күгәргән ергә һөртөгөҙ.
- Әгәр сәсегеҙ ҡойолоп, башығыҙ ялтырап барһа, ҡомалаҡ ярҙамға килер. 1 стакан ҡомалаҡҡа 1 стакан һыу ҡойоп ҡайнатығыҙ. 15-20 минут йылы урында тотоғоҙ. Аҙаҡ һөҙөп алып көнөнә өс тапҡыр 1 аш ҡалағы эсегеҙ. Бер үк ваҡытта баш тиреһен ышҡырға була.