Табиптар ауылға килде

Баймаҡ районы Йылым ауылында "Айыҡ ауыл" республика конкурсы сиктәрендә һәр төрлө сара уҙғарыла. Күптән түгел бында Сибай ҡалаһы дауаханаһынан медицина белгестәре һәм медицина колледжынан студент-волонтерҙар (ирекмәндәр) килде. Шулай уҡ халыҡты Сибай ҡалаһының "Һаулыҡ" медицина үҙәгенән килгән табип-терапевт ҡабул итте. Медиктар халыҡтың һаулығын ентекләп тикшерҙе, ЭКГ үткәрҙе, анализдар алды.
Ирекмәндәр һаулыҡ темаһына лекция уҡыны, балалар менән уйындар уйнаны. Шулай уҡ ошо көндә үткәрелгән район старосталарының пленар ултырышында алкоголь эсемлектәрҙең зыяны тураһында сығыш яһанылар. Халыҡ бындай осрашыуҙарҙан бик ҡәнәғәт ҡалды. Барыһы исеменән килгән ҡунаҡтарыбыҙға ҙур рәхмәт еткерәбеҙ һәм бындай осрашыуҙар йышыраҡ булһын тигән теләктә ҡалабыҙ.

Тәнзилә Кейекбирҙина.
#нацпроекты