Яңы ғына командировканан ҡайтып төшкән эшҡыуар Мәликә Мансуровна Иш-йәрованы көтмәгәндә кеҫә телефонына шылтыратып ҡала хакимиәтенә саҡырҙылар. «Ололар көнө алдынан тағы ла байрам үткәреү өсөн аҡса һығырғалыр яйҙары…», тип екһенһә лә, бында көткән ҡырамалай ҡырҡ мәшәҡәтен ҡуйып барып әйләнергә итте. Ни тиһәң дә урындағы етәкселек менән килешеп йәшәүгә ни етә, бөгөн ул ҡала хужаһына кәрәк, иртәгә үҙенең дә йөҙ һыуын түгеп шул йортҡа барыуы бик тә ихтимал.
Юлда сағында, көндәлек эшендә һәр саҡ спорт стилендә кейенеп йөрөй; джинсы салбар, килешле кроссовкалар, еңел куртка, шулай ҡулайлыраҡ. Ә хакимиәттең яҙылмаған үҙ ҡанундары, унда ни теләһәң шуны кейеп күренергә ярамай һәм килешмәй. Шуға фатирына һуғылып өҫтөн алыштырырға булды. Юл ыңғайы ювелир магазинына инеп йөҙөнә семәрләп ҡиммәтле таштар батырылған көмөш беләҙек, супермаркеттан оло пакет тултырып тәм-том алды, әммә гөлләмә һатып алыуҙы артыҡ иҫәпләне, сөнки бүләктәрҙе ҡабул итеүсегә бындай нескәлектең мөһим дә кәрәк тә түгел икәнлеген яҡшы белә. Ишекте асып инеү менән фатирҙы яңғыратып ҡысҡырҙы:
– Рәсимә? - Был ваҡытта ҡыҙының институтта икәнлеген белә күрә һораны, йоҡлап ҡалып ҡуймаһын был, тип хафаланыуы. - Әсәй, һин ҡайҙа?
– Рәсимә ни һинең артыңдан уҡ уҡыуына сығып һыҙҙы, иртәнге сәйен эсер-еп ебәрҙем. Миңә ҡалһа, һеҙҙән китеп ҡайҙа ғына барайым… - Бөксәңдәп, тыш та быш килеп зал яғынан һөйләнә-һөйләнә килеп сыҡҡан ҡарсыҡ яҙып ябынған яу-лығын төҙәткеләп ҡаршыһына баҫты.
Биреште һуңғы осорҙа Маһира ҡарсыҡ, күҙгә күренеп биреште, бөтөрөнөп китте. Ошоғаса тилбер йыбырлап йөрөп ятҡан, ауырлыҡһыҙ йорт мәшәҡәттәрен атҡарған теремек ҡарсыҡтың былай ҙа йоҡа кәүҙәһе хәлһеҙләнеп бөгөлдө, төҫһөҙ күҙҙәренең нуры ҡайтып күгелйемләнгән күҙ соҡорҙарына һеңеште, бураҙналар сыбарлаған йөҙөнән ҡан әҫәре ҡасты. Атлағанда ла уң яҡ ҡабырға аҫтын услап йөрөүҙе ғәҙәт итте, ашау эсеүҙе лә онотто, көсләп саҡырмаһаң өҫтәл янына килмәй ҙә, һеҙ юҡта эсем һыртыма сыҡҡансы тығындым, тип тә ялғанлай өҫтәүенә. Йәнә йыш ятаҡлай һуңғы осорҙа, оло йәштә икәнлегенә һылтанып табиптарға күренеүҙән ҡырҡа баш тартһа ла, сәләмәтләнеүенә өмөтө һүрелмәгәндер күрәһең, үҙенсә дауаланып аҙаплана. Шулай ҙа зарын, уфтаныуҙарын тышҡа сығармай, шәлкемләп бәйләп киптерелгән әрем, меңъяпраҡты бергә ҡушып ҡайната ла, ҡуйы сәй төҫөнә ингән төнәтмәне бисмиллаһын әйтеп сытыраймай ғына эсеп ҡуя, шунан ҡыуарған, шау һөйәккә ҡалған ҡул һырты менән ирендәрен һыпырып, башҡарырҙай күренгән йорт мәшәҡәттәренә тотона ла китә. Йәлләй әсәһен, ауылдан ҡуҙғатып алып килеп, бында, туғыҙынсы ҡатҡа бикләп ҡуйыуына үкенә лә биреп ҡуя, мәгәр етмешен тултырған ҡарсыҡты ауыл ерендә ҡалдырыу мөмкин булмаған эш. Йорт-ҡурамды туҙҙырғым килмәй, йәнә ҡош ҡортомдо, бесәй-этемде кемдең ҡулына ҡаратып ҡалдырам, тип һуңғы көнөнә тиклем бында күсеп килергә теләмәй ҡырталашты. Ҡышын-йәйен ҡала менән ауыл араһын тапап, ҡурсалау-хәстәрләүҙәрҙән арыған Мәликә әсәһен һуңғы сиктә күндерҙе барыбер.. Хәҙер йәне тыныс, көнитмеше теүәл: дүрт бүлмәле фатирҙа әсәһе, институттың һуңғы курсында уҡып йөрөгән Рәсимә ҡыҙы бергәләп көңгөр-ҡаңғыр йәшәп ятҡан көндәре. Хәлбүки, тормошоноң бөтөнлөгө китек барыбер, ҡыҙы Рәсимә бишенсе класта уҡып йөрөгән йылы тау байыҡтырыу комбинатында баш инженер вазифаһында эшләп йөрөгән Зиннуры ҡапыл ғына йөрәк сиренән үлеп китте. Шаңҡыны, аптыранды, ҡайҙа барып бәрелергә белмәне башта. Шунан иҫен йыйғас, хаҡимиәттә юрист вазифаһында эшләп йөрөгән еренән түңәрәк кенә кредит алып, алда торған ҡыйынлыҡтарҙан ҡурҡып тормай үҙенең шәхси эшен асып ебәрҙе. Хоҡуҡи өлкәләге белемен урынлы ҡулланып, сәмләнеп, ныҡышмал тотонғайны кәсебе лә уңышлы ғына китте, матди хәле лә зарланырлыҡ түгел, уның менән партнерлыҡ итергә теләүселәр ҙә бихисап, аҡса, тип тә йонсомай, танып белгән ҡала етәкселеге лә уға ихтирам менән һанлап ҡарай.
– Әйҙә әле… - Сибек яурындан ҡармаған Мәликә Мансуровна әсәһен зал яғына ыңғайлатты, сығып диванға ултырғас алдына бүләген һалды:
– Ике көндән ололар көнө, һине мин, Рәсимә ейәнсәрең шул байрам менән ҡотлайбыҙ. Ошо беләҙекте икебеҙ исеменән ҡабул ит, ошонан да ҡулай нәмә тап-маным.
– Ай, Аллам, расхутланмаһаңсы шул ҡәҙәре, күстәнәсе тағы нимәгә, һыуытҡыс тулы тәғәм… - Шулай һөйләнһә лә Маһира ҡарсыҡтың йөҙө яҡтырып китте, аҙыҡ-түлек тулы пакеттың эсенә ҡәнәғәт күҙ атты, ҡатын-ҡыҙ көйәҙләнеүе еңеп затлы беләҙекте тупайған ҡушҡар тапҡырына элде һәм ҡурайҙай беләген алға һоноп әйләндергеләне. Апаруҡ мауыҡты шулай, тәтәйенә ҡыуанған сабый, тиерһең.
– Әсәй, һиңә бер ни ҙә йәл түгел, оҙаҡ йәшә, йәме, тағы сәләмәт бул!
– Йә! - Ҡарсыҡтың йөҙөнән моңһоулыҡ күләгәһе йүгереп үтһә лә ҡәнәғәт кеткелдәне. - Эштәрең нисек бара һуң, балам, иртән сығып китеп кис ҡайта инең, бөгөн ни сәбәптәндер иртәләгәнһең.
– Тәгәрәп кенә китеп бара, ай аҙағында, теге, ике йыл элек ябылған ит комбинатының бер яртыһында колбаса цехын асабыҙ, йыл аҙағына ҡәҙәр тағы ла бер база нигеҙендә һарыҡ йөнө, тиреләр ҡабул итеп эшкәртә башлаясаҡбыҙ. Уның өсөн дә ҡулайлы бина таптыҡ, шуны ремонтлап ебәргәндә, эсенә кәрәкле ҡорамалдар ҡуя башларға ла мөмкин. Бинаға ҡағылышлы юридик документтарҙы ла әҙерләгәнбеҙ.
– Ауыл шөғөлөн ҡыуалатаһың әләйгәс, ҡатын-ҡыҙға кейем-һалым, матурлыҡ салондары, сәс алдырыу урындарын асып, шуның мәшәҡәттәре менән шөғөл-ләнеү ҡулайлыраҡ түгелме?
– Һуң мин бит ауыл балаһы, ер хәстәре йәнемә яҡын һәм ҡәҙерле. Алдағы планда яҡын-тирә райондарҙың береһендә тирмән асыу, фермаларҙан һөт һатып алып май бешеү, ҡорот, эремсек етештереү уйы ла бар әле. Урындағы халыҡҡа ҡулай, миңә отошло буласаҡ. Ир-егеттәр тотонмай, тип ҡул ҡаушырып ятайыммы тағы? Тик бына һуңғы йылдарҙа ҡабатланып килгән ҡоролоҡ ҡына бәкәлгә һуға: баҫыуҙарҙа уңыш, үлән кибеп бөткәс һөт кәмей. - Тороп баҫҡан Мәликә Мансуровна үҙенең бүлмәһенә йүнәлде лә кейем шкафын асып өҫтөн алыштырырға керешеп китте, үҙе асыҡ ишек аша һөйләшеүен дауам итте. - Иртәләүемдең әтнәкәһе шунда, шылтыратып ҡала етәкселегенә саҡырҙылар, кәңәшмәлә ҡатнашыу мотлаҡ, тинеләр.
– Улай икән… - тип һуҙҙы Маһира ҡарсыҡ, уны, өй кешеһен эш ығы-зығы-һы бөтөнләй борсомай, шуға әңгәмәне үҙ яйына ҡайырҙы. - Райондар тураһында башлағасың һорайым әле, йөрөгәнеңдә беҙҙең ауылға һуғылаһыңдыр ҙа?
– Хәҙер янымда булғасың, йәнә унда яҡын туғандар ҡалмағас артыҡлап ҡайтҡы ла килмәй. Былай, булып киттем унда, ун-ун биш көн элек - Рәсми бараһы ур-ындарға тәғәйенләнгән костюм-күлдәген кейеп, трюмо алдына баҫты ла бит-йөҙөн рәткә килтерҙе, шунан зал яғына муйынын һондо. - Нишләп ҡапыл ғына ауыл иҫеңә килеп төштө әле?
– Һин онотһаң да Сабир бер ҙә генә лә иҫемдән сыҡмай, килен булып төш-өп, бауыр баҫып йәшәгән ауылым, ни тиһәң дә. - Маһира ҡарсыҡҡа «ҡайтҡым ки-лмәй» һүҙ бәйләнеше оҡшаманы шикелле, әсе ҡапҡандай ризаһыҙ сытырайҙы. - Нишләптер ауылға туҡтап китеүең хаҡында һүҙ ҡуҙғатманың бер тапҡыр булһа ла, будты ул һиңә ят төйәк.
– Әйтһәм, өй беренсә төшөп һәр береһен теүәлләп һораша башлаясаҡһың. Ә мин ауыл башлығы, теге Ҡара Гәрәйҙе күрҙем дә, йомошомдо йомошлау менән кире боролдом.
– Ауылдан сығышлай беҙҙең өй яғына ла күҙ һалғанһыңдыр әле?
– Һалмаған ҡайҙа. Бөткән. Ергә һеңешкән тауыҡ кетәгендәй генә нәмә ҡалған шунда.
– Улай тимә, кендек киҫелгән йорт бейеклеге менән түгел, булмышты арбап үҙенә тартып, саҡырып тороуы менән ҡәҙерле. - Әсәһе гелән һүҙҙәрҙе һайлап, уға ниндәйҙер тәрән мәғәнә һалып һөйләргә ярата, зиһенең уяу икән аңла, төшөнмәһәң, уныһы инде һинең эш, йәнәһе. Шуларҙы әйтте лә берауыҡ тынып ҡалғас фе-керен йомғаҡланы - Һин генә түгел, ағайың, апайҙарыңдың йылыһы һеңгән уға.
– Әсәй, һин ысын философ!
– Уныһы кем була тағы?
– Тәрән фекерле аҡыл эйәһе.
– Аҡыллымын тип әйтеүе үҙе үк ахмаҡлыҡ, әммә белем алыуға килгәндә йүнле уҡыу эләкмәне шул беҙгә - миңә лә, атайыңа ла. Ҡайтышлай, беҙҙең ауылдан бире юл эсендә Ҡәнзәфәр ауылы ята бит әле, ауыл осондағы йортҡа ла иғтибар итмәгәнһеңдер инде?
– Ауылдағы һәр хужалыҡты ҡарап-теүәлләп йөрөй алмайым! Ташландыҡ өй нимәгә ул миңә?! - Кейенеп бөткән Мәликә залға сығып баҫты. Яуап ярайһы уҡ тупаҫ ишетелде.
Күпте күргән әсәһе генә ҡылъяйманы:
– Унда һинең атайың йәшәгәнлекте беләһең. Өйө яғына һуҡмаҡ бармы, уға инеп-сығалармы икән, тим.
– Ҡараманым, күрмәнем, тим бит.
– Һе, сәйер холҡоң менән зерә лә аптыратаһың. - Яуап тағы оҡшаманы. Әсәһе һуҡ бармағы менән яҫы маңлайын ыуҙы. Үпкәләгәндә уның шулайта торған ғәҙәте бар.
– Ҡәнзәфәр ауылы аша үткәндә телефондан һөйләшә инем.
– Телефундан, имеш, бына аҡланыр яуабын да тапты. - Әрепләшеүгә тарт-ым һөйләшеүҙе дауам иткеһе килмәгәнгәлер һин дә мин һораны. - Атайыңдың һуңғы алған әбейе үткән йыл үлеп ҡалған, тип ишеткәйнем.
– Әсәй, ҡалала туғыҙынсы ҡатта йәшәйем, тимәйһең, тирә-яҡтағы хәлдәрҙе белеп, белешеп ултырған көнөң.
– Һуң белмәй тағы, яҙ көнө беҙҙең ҡаршы яҡ урамдағы Нурия килен килеп киткәйне бит хәлемде белергә, шул еткерҙе.
– Атайымдың был нисәнсе ҡатыны ине әле?
– Бына быныһы инде, һин хисаптар һан түгел.
Иҫкәрмә йомшаҡ тауыш менән әйтелһә лә ярайһы уҡ уҫал һәм ҡәтғи яңғыраны.
Тамам кәйефе киткән Мәликә Мансуровна ишеккә йүнәлде, шулай ҙа мөмкин тиклем итәғәтлек күрһәтеп әсәһенең байрам кәйефен һаҡларға тырышты:
– Әсәй, Рәсимә ҡайтһа, әйт, табын хәстәрләһен, өсәүләп ултырып алырбыҙ. Ни тиһәң дә һинең йылына бер килгән байрамың, мине тегендә моғайын да оҙаҡ тотмаҫтар.
- Имен-аман ғына йөрө балам, юлың уң булһын! – Маһира ҡарсыҡ көн һайын ҡабатлаған теләген теләп ҡалды.