Ҡыш бабай урынына омикрон килеп ҡуймаһын

Коронавирустың яңы штамы – омикрон әлеге ваҡытта  Испания, Австрия, Японияла ныҡ тарала. Шулай уҡ Германияла, Канадала, Италияла, Ҡытайҙа ла уның менән ауырыусылар бар. Рәсәйгә әлегә был штамм инмәгән, тип билдәләнелә.  Шулай ҙа хәҙер ПЦР-тестар 72 сәғәт урынына 48 сәғәт кенә ғәмәлдә була. Роспотребнадзор башлығы Анна Попова һүҙҙәренсә, был яңы омикрон-штамдың үҙенсәлектәре менән бәйле. Рәсәй белгестәре әлегә илдә яңы штамды йоҡтороу осраҡтарын теркәлмәүен билдәләһә лә, Роспотребнадзорҙа омикрон-штамды асыҡлау өсөн махсус тест әҙерләгәндәр. Коронавирустың яңы штамы табылған илдәрҙән ҡайтҡан граждандар 14 көн карантинда ултырырға тейеш. Билдәле булыуынса,  яңы вирус тиҙ тарала, бик хәүефле: тән температураһы бер нисә көн юғары һаҡлана, үтә ныҡ баш ауырый, мускулдар бөтөнләй эшләмәү сәбәпле кеше хәлһеҙләнә.