СӘСКӘ ШИҢМӘҺЕН!

Японияла бер легенда йәшәй: Кеше мәрхүм булғас, уның йәне күккә олғаша. Уға күңелһеҙ булмаһын өсөн Аллаһ уға бәләкәй тәҙрәләй уйым ҡалдыра. Мәрхүмкәй шунан яҡындарын ҡарап ултыра, имеш. Уйымда, тәҙрә төбөндә, сәскә үҫә һәм уның һабағына ҡыңғырау ҡуйылған.

Мәрхүмде яҡындары телгә алһа, шул ҡыңғырау тауыш бирә. Мәрхүм хаҡында яҡшы хәбәр һөйләһәләр, уйымдан ҡояш яҡтыһы инә. Ә юҡһынып илаһалар, ямғыр яуа һәм сәскә һыуға кинәнеп, үҫеп китә, күпереп сәскә ата.

Тәүге көндәрҙә ҡыңғырау йыш зыңғырлай, яҡшы хәбәрҙәр ишетелә, кешеләр илаша, һағына…

Яйлап ҡыңғырау тауышы кәмей, ҡояш та нурын һаран һибә, ямғыр ҙа һирәгәйә һәм сәскә шиңә башлай…

Һәр кемдең мәрхәмәтле йөрәге булырға тейеш: ул мәрхүмен иҫкә алһын, яҡшы һүҙ әйтһен, яҡынының йәне ҡараңғылыҡҡа сорналмауын теләһен.

Беҙҙән киткәндәр тыныс булһын. Ҡыңғырау зыңлап торһон… Сәскә күпереп сәскә атһын…

Автор:Резеда Валиева

Читайте нас: