Бынан бер нисә йыл элек приют ишеге алдындағы ултырғысҡа һаҡҡан бер ир бала менән ҡыҫҡа ғына һөйләшеү булып алды. Уға 9-10 йәштәр самаһы ине шикелле.
- Һаумы? – тинем, тегенең янынан урын алып.
Сәләм алынманы, малай ҡаш аҫтынан уҫал ҡарап ҡуйыу менән генә сикләнде.
- Таныш булайыҡ! – Исемемде атаным. – Ә һинеке?
- Ну, Алексей. – Үҙенең үҫкән икәнлеген күрһәтергә теләгәндәй яурындарын яҙып турайыңҡырап ҡуйҙы. - Нимәгә ул?
- Былай ғына. Һин моғайын да ошонда йәшәйһеңдер?
- Йәшәмәйем, ваҡытлыса ғына урынлаштырҙылар.
Бындай балаларҙың яҙмышы билдәле – йә уларҙы тәрбиәгә берәйһе ала, йә улар ары балалар йортона оҙатыла. Шуға төпсөнөп малайҙың күңеленә яра һалырға теләмәй:
- Бында нисек? – тинем.
- Бара. Ашатыу ҙа, тәрбиәселәр ҙә насарҙан түгел, бүлмәләр таҙа, яҡты, йылы.
- Тимәк ожмахтағы һымаҡ!
- Ә миңә ожмах кәрәкмәй, өйгә ҡайтҡым килә, атай-әсәйемә!
- Улайһа килеп алырҙар тиҙҙән, көт!
- Килмәҫтәр шул... Улар икеһе лә эскесе... Барыбер ҙә өйгә ҡайтҡым килә... – Малайҙың күҙҙәре йәшкәҙәне.
Насар атай-әсәй булмай, улар бала өсөн теләһә ниндәй шарттарҙа ла тиңдәшһеҙ һәйбәт!
Шул, ата-әсәһен фәрештәгә тиңләп яратҡан, уларға йәндәре-тәндәре менән бирелеп китеп табынған балаларҙы яҡлайыҡ, яҡлайыҡ һәм һаҡлайыҡ.
Ә ожмахҡа килгәндә ул ата-әсәнең аяҡтары аҫтында, шуға ла бит бала һеҙҙең итәккә сат йәбешкән, тормош юлдарынан етәкләп алып барһын, тип өмөт менән төбәлеп ҡулығыҙға үрелгән!