Уғаса быуаға яҡынланыҡ. Быуа, киң генә уйһыулыҡты тултырып, алҡынып ята. Алыҫтан ҡарағанда ғына саф көмөш төҫлө икән, эргәһенә килгәс, уның эсе тулы сүп-сар ҡатыш болғансыҡ һыу икәнлеге күренде. Баяғы күңелде елкендергән төпһөҙ күк зәңгәрлеге лә, усаҡтай баҙыраған ҡыуаҡтар ҙа, әбейҙәр сыуағында ирәйеп ятҡан һарғыт ҡамыллы ер ҙә ошо болғансыҡ буръяҡҡа мансылып бысранғандай булды.
Шул саҡ ҡапылда көтөлмәгән мөғжизә тетрәтеп ебәрҙе:
– Аҡҡош! Ҡустым, ҡара сәле, аҡҡош! Күрәһеңме, ана, ҡаҙҙарҙан ситтәрәк яңғыҙы ғына йөҙә! Туҡта, хәҙер өркөтәһең бит!
Яңылыҡ Илһамға бөтөнләй тәьҫир итмәне, ул вайымһыҙ ҡалды. Шулай ҙа мине тыңлап, машинаһын туҡтатып, моторҙы һүндерҙе.
– Ҡайһылай ғорур! Бөтә тирә-яҡты йәмләй. Ише ҡайҙа икән? Улар яңғыҙ йәшәмәй шикелле.
– Кем белһен һыңарының ҡайҙалығын. - Кабинанан еңел генә һикереп төшкән шофер тәгәрмәстәрҙе типкеләп тикшерергә керешеп китте. Мин дә әйберҙәремде ситкә ырғытып, өҫ-башты туҙандан ҡаҡҡыларға тотондом. Илһам машинаһын урап сыҡҡас, быуа янына килеп һүҙен осланы. - Бынан бер ваҡытта ла китмәй ул, көн һайын ошонда.
– Матур…
– Ҡабаланам, ағай, йә һөттө әсетермен. Әйҙә, ауылда төшөрөп ҡалдырайым да.
– Ярай, һин ҡуҙғал, ҡалайым әле. Ауылға килеп еттек бит.
– Эшең оҙаҡҡа һуҙылмаһа кире боролғанда һуғылырмын. Кемдәрҙән эҙләйем?
– Әхмәт Мырҙабулатов тигән кеше йәшәргә тейеш бында. Шунда ине йомош.
Беләм уны, өйө клуб ҡаршыһында ғына.
Машина ҡуҙғалып китте. Мин аптыраулы ла, һоҡланыулы ла ҡарашымды аҡҡо-штан ала алмай иләҫләнеп торғандан һуң, сиҙәмдә ятҡан плащымды тартып өҫтөнә ултырҙым.
Аҡҡош ҡарашымды тойҙо, буғай, шәп йөҙөп быуа уртаһына китте, шулай ҙа ундағы әрпеш ҡаҙҙарға ҡушылманы, уларға етәрәк туҡтап, ҡанаттарын ҡабартып, оҙон муйынын дуғаландырып, урынында өйрөлә башланы. Йәнәһе, күрегеҙ, буй-һынымды, ниндәйерәкмен!
Хәтһеҙ генә шулай үҙенең нәфислегенә маһайғас, хәүеф юҡлығын тойоп, ярға яҡынлашты. Аҙыҡ әҫәре юҡлығын белһәм дә, ҡулдарым икмәк һынығын эҙләп, портфель төбөн ҡапшаны.
– Мәшәҡәтләнмә, дуҫ кеше, сит-яттарҙың ҡулынан алмай ул.
Тертләп боролоп ҡараным.
Артыма терәлеп тигәндәй, ят әҙәм килеп баҫҡан имеш.
– Былай ҙа бирер нимәм юҡ, тешләрлек ризыҡ яңылыш ҡына ятмаймы тип соҡоноуым.
Ят кешене яуабым ҡыҙыҡһындырманы булһа кәрәк, ул сеүәтәле ҡулын алға һоноп, ярға ҡарай атланы.
Килеүсенең буй-һынына иғтибар иттем. Ҡыҫҡа буйлы булһа ла, өрөп тултырылғандай тумалаҡ, ныҡ кәүҙәле ир баҫҡан һайын ерҙең биле һығылып китәлер һымаҡ, шуға ла ашыҡмайынса һәлмәкләп кенә, саманы белеп аҙымлай.
Еңһеҙ күлдәгенән күренеп торған ҡабарынҡы мускулдарының бармаҡ йыуан-лыҡ тамырҙарға сырмалыуы уның ғәҙәттән тыш көслө икәнлеген күрһәтә. Атлаға-нда ҡулын һелтәмәүе лә сәйер тойолдо. Шуға ул, ситтән ҡарағанда, артҡы аяҡтарына баҫҡан айыуҙы хәтерләтеп тә ҡуя.
Ир яр ситенә килде, һауытын ялпаҡ таш өҫтөнә ҡуйҙы, эсендәге аҙыҡты һыуға сылатып, дәү устарында әүәләп, болғатырға тотондо. Ҡабырғалай ултырғас, хәҙер уның йөҙө бермә-бер асыҡ күренә.
Бынамын тигән йомро баштағы бөҙрәләнеп һибелгән сөм-ҡара сәстәрҙең әҙерәге тирле маңлайға йәбешкән, ҡалғандары талғын иҫкән елгә туҙырап торалар. Ирҙәрҙә генә була торған тура, ныҡ танау, тоташып тиерлек үҫкән яҫы ҡаштар, батыңҡыраҡ булғанға тирә-йүнгә шикләнеберәк ҡараған, шулай ҙа йөҙҙө боҙмаған күҙҙәр уны, һис шикһеҙ, күрмәлеклеләр рәтенә ҡуйыр ине лә бит, бөтә эште бешкән грушаны хәтерләткән һалпышыраҡ бит алмалары боҙа. Алмалар танауҙы, йоҡа иренле ҡымтыҡ ауыҙҙы, ҡаштарҙы ҡап урталай булергә теләгәндәй, ике яҡҡа тартылғандар. Тағы уң яҡ сикәһендә ялтырап тәрән яра йөйө һеңгән. Хәрәкәттәренең айыуға, йөҙөнөң йомранға тартым булыуы уның кеше күркәмлеген күпкә ҡайтышландыра.
Иғтибарлап күҙәткән арала ир шөғөлөн ҡуйҙы ла гөрһөлдәп торған тауышы менән һаман да һай урындараҡ быстырҙаған ҡошҡа өндәште:
– Кил, ашап ал, юғиһә ҡайта белмәйһең ошо быуа тирәһенән.
Аҡҡош ҡабаланмай ғына ярға сыҡты, ҡағынды, суҡыштырғылап ҡауырһындар-ын ҡабартып ебәрҙе, һис тартынып тормай иргә яҡын килде лә, алға һонолған устарға йәбешкән аҙыҡ ҡалдыҡтарын тәмләгәс, ҡарһаланмай ғына һауыттан ашарға тотондо.
– Йә, ярай, күп ҡалманы һалҡындарға, һыу туңһа, былай ҙа ҡыш оҙоно йонсой торғанһың. - Ҡош ашай, был мөңгөр-мөңгөр һөйләнә. - Нисауа, нисек тә ҡышларбыҙ әле.
Ир сүгәләп ултырған еренән бер аҙ аушайыңҡырап, салбар кеҫәһенән тәмәке алып ҡапты, унда-бында һуҡҡылап шырпы эҙләне, таба алмағас теләр-теләмәҫ кенә тороп, миңә ҡарай йүнәлде:
– Шырпың юҡмы?
– Тәмәке тартмаһам да шырпы йөрөтәм былай. - Шулай һөйләнеп һорағанын тотторҙом. Тоҡандырҙы. Тәрән итеп һурып тарта башланы. Күренеп тора, гәпләшерлек яйы тойолмай бының.
Һүҙ ялғарға теләп өндәшәм:
– Быйылғы көҙҙө әйтәм, бигерәк матур.
– Ыһы.
– Урып-йыйыуҙы лә әллә ҡасан ослағанһығыҙҙыр инде.
– Ыһы.
– Һеҙҙең ауылда алдынғы комбайнер Әхмәт Мырҙабулатов тигән кеше йәшәй, уның тураһында район гәзитенә яҙырға иҫәп, шуны йомошлап килә ятыу әле.
– Юҡ артынан йөрөйһөң.
Әле башланып та өлгөрмәгән әңгәмә өҙөлдө. “Йомран” уйсанланып, бейектән көнъяҡҡа киткән ҡоштар тубына төбәлгән.
Был сәйер кешегә булған ҡыҙыҡһыныуым артҡандан-артты. Шуға ла килделе-киттеле һөйләшеүенә артыҡ иғтибар итмәҫкә тырышам.
– Ҡоштар китә. Был аҡҡош та иштәренә эйәрер, бәлки…
– Эйәрер булһа бында нишләп ултырһын?! Оса алмағанға ултыра. Ҡанаты һыныҡ.
– Улай икән.
– Нимәһе улай, кем, ҡорҙаш тип әйтәйемме, хәбәрсе, типме, бик ыҫмалаға, бәйләнсеккә оҡшағанһың бит әле. Һөйләшәһем дә килеп тормай, һин килеп төпсөнөп-төпсөнәһең. Аҡҡоштоң ҡанаты инде нишләп һынған, тип һора. Атҡандар уны, ишетәһеңме, атҡандар!
Көкөрт һымаҡ тоҡанып киткән, тартып ултырған тәмәкеһен ситкә атҡан ирҙең ҡыҙыулығына иғтибар итмәнем, тыныс ҡалдым:
– Ҡоштарға ҡанығыу ҡанһыҙҙар, бәғерһеҙҙәр шөғөлө.
Яралы аҡҡошто йәлләү, хәленә инеү тынысландырыр тиһәм, яуабым быны оторо ярһытты ла ебәрҙе:
– Һинең унда эшең булмаһын, аңлашылдымы? һәммәһе лә белдекле, һәм-мәһе лә аҡыл өйрәтә, тик мин генә хәшәрәт, мин генә ҡанһыҙ! - Ир ырғып торҙо ла, эре-эре аҙымлап, ҡаты баҫып ауыл яғына ҡарай атланы.