АТАЙСАЛ
+25 °С
Болотло
Антитеррор
Бөтә яңылыҡтар
Әҙәби мѳхит
14 Ноябрь 2019, 13:05

Доғаларым сыға йөрәктән

Баламды һаҡла!Аңһыҙ ҡазаларҙан һаҡла Аллам,Ғәзиздәрҙән ғәзиз баламды.Ҡолар ерен алдан күрә белһәм,Йөкләп түшәр инем һаламды. Һаҡланғанды һаҡлармын ти Хоҙай,Башҡа ғына бирмә ҡазаны.Гонаһтарым булһа яуап бирәм,Балаларға һалма язаны. Юлдарына йомшаҡ келәм итеп,Изге доғаларым түшәлһен.Яман теләктәрен йолҡоп ташла,Яҡшылары ғына үтәлһен. Иман байлыҡтары бирһен берүк,Хәләл ризығынан айырма.Ҡан туғанын тартып осор өсөн,Киргән ҡанаттарын ҡайырма. Ҡөрьән сүрәләрен белмәһәм дә,Доғаларым сыға йөрәктән.Бала саҡтан ошо теләктәрҙе,Ятлай-ятлай әсәй өйрәткән. Балаҡайым, балам, бауыр итем,Бәхеткенәм минең, йөрәк майым.Көндөҙ ҡояшһың һин минең өсөн,Ә төндәрен инде яҡты айым.Һинең бәхет, балам, минең бәхет,Хоҙайымдан шуны һорайым.

Гөлиә Мөкминова-Азаматова – Ейәнсура районы Әбүләис ауылы ҡыҙы. Әле Себер тарафтарында йәшәй. Бер улға, бер ҡыҙға ғүмер бүләк иткән. Ғаиләлә кинйә лә, иркә лә һигеҙенсе бала булып үҫкән Гөлиә һөнәре буйынса бухгалтер булһа ла, шиғриәткә, әҙәбиәткә яҡын. Уның шиғырҙарын беҙҙең “Атайсал” гәзите уҡыусылары көтөп ала.
“Шиғриәткә һөйөү йырға-моңға ғашиҡ, йор һүҙле атай-әсәйемдән килә”,--ти ул.
Баламды һаҡла!
Аңһыҙ ҡазаларҙан һаҡла Аллам,
Ғәзиздәрҙән ғәзиз баламды.
Ҡолар ерен алдан күрә белһәм,
Йөкләп түшәр инем һаламды.
Һаҡланғанды һаҡлармын ти Хоҙай,
Башҡа ғына бирмә ҡазаны.
Гонаһтарым булһа яуап бирәм,
Балаларға һалма язаны.
Юлдарына йомшаҡ келәм итеп,
Изге доғаларым түшәлһен.
Яман теләктәрен йолҡоп ташла,
Яҡшылары ғына үтәлһен.
Иман байлыҡтары бирһен берүк,
Хәләл ризығынан айырма.
Ҡан туғанын тартып осор өсөн,
Киргән ҡанаттарын ҡайырма.
Ҡөрьән сүрәләрен белмәһәм дә,
Доғаларым сыға йөрәктән.
Бала саҡтан ошо теләктәрҙе,
Ятлай-ятлай әсәй өйрәткән.
Балаҡайым, балам, бауыр итем,
Бәхеткенәм минең, йөрәк майым.
Көндөҙ ҡояшһың һин минең өсөн,
Ә төндәрен инде яҡты айым.
Һинең бәхет, балам, минең бәхет,
Хоҙайымдан шуны һорайым.
***
Туҡтай күрмә!
Эй, ғүмерем, туҡтай күрмә берүк,
Һис кенә лә йәшәп туйманым.
Тәмеңде лә яңы ғына белдем,
Тулыһынса әле тойманым.
Әкренерәк зинһар, ҡыуалама,
Айҙарыңды еккән ат итеп.
Ай артынан йылғыр йылым үтә,
Ғүмеркәйем йомғаҡтарын һүтеп.
Баҡыйлыҡтан ҡалыр юлдар эҙләп,
Үткәрмәҫмен ғүм(е)рем заяға.
Күкрәк киреп бер йырлайһы ине,
Күтәрелеп бейек ҡаяға.
Туҡтай күрмә берүк ғүмеркәйем,
өҙә күрмә тартып йомғағым.
Төйнәй-төйнәй килдем ошоғаса,
Әммә һис тә йәшәп туйманым.
Был донъяла эшем бик күп әле,
Тиҙ арала түгел бөтөрҙәй.
Ирешмәнем әле маҡсатыма,
Нөктә түгел, ҡуйҙым өтөрҙәр.
«Тегендә» лә бәлки кәрәкмендер,
Кәрәк булһам әле, көтөрҙәр...
Гөлиә Азаматова-Мукминова
Эй, Хоҙайым
Һынауҙарың ауыр Аллам,
Көстө ҡайҙан алайым?
Нисек кенә уртым сәйнәп
Сабыр булып ҡалайым.
Гонаһтарым күп инеме
Кисермәнеңме үҙең?
Теҙҙәремә тороп һинән
Һорайым тағын түҙем.
Ҡөҙрәтең киң, беләм, Хоҙай
Бары һинең ҡулыңда.
Ташламасы ярҙамыңдан
Ауыр тормош юлында.
Һаулыҡ бир мохтаж затыңа,
Ғүмер бир оҙон итеп.
Көс тә кәрәк көрәшергә
Һынауҙарыңды үтеп.
Ҡалдырма бер үк, Хоҙайым,
Ҡайғы урмандарында.
Пар ҡанатымды һындырма
Йәйеп осар сағымда.
Һаулыҡ бир, ғүмер бир, Аллам,--
тип үтенәм тағын да.
***
Һәр кемдең дә һандығында
Йәшерен «һөлдә»һе бар.
Үкһеп илар мәлендә лә
Йылмайып көлгәне бар.
Соҡонмайыҡ кешеләрҙең,
Серле һандыҡтарында.
Асылмай торғандары бар
Хатта йән дуҫтарына.
Ярһытмайыҡ яраларын,
Яңыртып тырный-тырнай.
Ҡан тама ярһыу йөрәктән
Ғәйбәтте тыңлай-тыңлай.
Онотмайыҡ, һәр кемдең дә
Һандыҡта «һөлдә»һе бар.
Йәшле күҙҙәрен йәшереп,
Йылмайып-көлгәне бар.
***
Әсәйлеләр бәхетле
Шыжлат әле әсәй самауырың
Һинең ҡулдан эскән сәй тәмле.
Ары торһон зәһәр ресторандар
Самауырың көйләй, эй йәмле.
Күкрәгемә йылы таралғандай
Ҡайнар сәйҙән миңә күскәнме?
Юҡ, ул тойғо бала саҡтан килә
Әсәй, һиңә иркәләнеп үҫкәнмен.
Үҫкәнмен дә әммә күңелемдә
Һаман сабый булып ҡалғанмын.
Йөрәгеңден иң-иң түрҙәренән
Һөйөү гөлөн йыйып алғанмын.
Рәхмәттәрем сикһеҙ һиңә, әсәй,
Нәсихәттәреңә таянам.
Кисен ятһам, таңда торһам да мин
Бисмилламды уҡып уянам.
Өҫтәлеңдә йырлай самауырың,
Һөйләп һүҙҙәр бөтмәҫ күрәһең.
Хоҙай яҙған тиһең бәндәләргә
Ҡайҙа йөрөп, ниҙәр күрәһен.
Аҡыл йыям төпһөҙ зиһенеңдән,
Тәжрибәң күп, күпте күргәнһең.
Тормош йөгөн тартып аҡыл менән
Сабырлыҡтан арҡан үргәнһең.
Яҡын дуҫты, яман дошманды ла
Яҙмыш яҙған тиһең маңлайға.
Аҡыллылар бары фәһем ала
Үҙ хатаһын күреп аңлай ҙа.
Кисерә бел, таштан ауыр гонаһ
Кешеләргә асыу һаҡлаһаң.
Йылмай, ҡыҙым, бары йылмай ғына
Әгәр йылы һүҙҙәр тапмаһаң.
Иҫеңдә тот, кеше рәнйештәре
Быуат үткәс ҡайтыр балаңа.
Үҙеңдекен һаҡла күҙ алмалай,
Кешенекен көнләп һанама.
Әсәкәйем, һинең нәсихәтте
Еткерермен мин дә балама.
Оҙаҡ йәшә, ғүмер үтте тиеп
Йәшле күҙең менән ҡарама.
Һыуынмаһын әсәй өҫтәлендә,
Балаларын көтөп самауыр.
Әсәйлеләр бигерәк бәхетле беҙ,
Әсәйһеҙҙәргә бит ныҡ ауыр…