Кешелекле булып ҡалам

Бөгөн бер аҙ һуңлабыраҡ Бер-ике тиҫтә йылға,Башҡа аҡыл килеп индеДиңгеҙҙәй тәрән, мул да.

Бөгөн бер аҙ һуңлабыраҡ

Бер-ике тиҫтә йылға,

Башҡа аҡыл килеп инде

Диңгеҙҙәй тәрән, мул да.

Барлыҡ таныш-тоноштарым—

Бына һин, эйе, ул да

«Кеше» булып бөткәс күптән,

Бер аҙ ҡалһа ла һуңға,

Башҡа аҡыл килеп инде.

Ах! ниҙәр ҡылғанмын бит:

Кәрәк булыр түрәләргә

Яҡты йөҙ ҡыҙғандым бит;

Гел дөрөҫөн әйткән булдым—

Яҡшы һүҙ ҡыҙғандым бит.

Елгә ҡаршы атлай-атлай,

Аяҡтағы пар ҡаталай,

Иҫкергән, туҙғанмын бит,

Иртәрәк туҙғанмын бит.

Иҫке ҡата, иҫке ҡата...

Көндән көнө аҡыл арта:

Бәлки берәй хужаның—

Мине «Кеше» итерлектең

Таҙартырға арт яғын?

Әллә ниндәй уйҙар килә—

Аҡыл күп шул башымда.

Кәрәк икән урыҫ булам,

Булам бүрәт, булһын да!

Тик файҙаһы ғына булһын—

«Кеше» булғы килә бит,

Ваҡыт тормай бер урында—

Елдән етеҙ елә бит.

... Бөгөн аҡыл килде миңә

Диңгеҙҙәй тәрән, мул да,

Әллә инде, киреһенсә,

Әҙ-мәҙ аҡылым, ул да

Сығып китте минең баштан?

...Күптән ҡалғанмын һуңға,

Кешелекле булып ҡалам

«Кеше» булалмаһам да!

* * *

Ас бүрегә икмәк кеүек ярты телем—

Шикһеҙ, сикһеҙ ҡәҙерлеһең ғәзиз телем!

Икмәк өсөн йәнен бирер бүре кеүек,

Телем барҙа ғына үҙем кеүек...

Ҡанға батты, әммә, бирешмәне—

Шул телемен яттар менән бүлешмәне...

Бында ондо тоғо менән алырға, тип

Яттар килгән.

Ҡайҙа боҫоп ҡалырға, тип

Башын ватҡан шакалдарға әйтер һүҙем...

Улай тиһәң һүҙем әрәм.

Ярай, үҙем !

Фәнис Сирбаев.