Күрше инмәгәндер ул?

Башлыса йома намаҙынан һуң имамдар хөтбә үткәрә, йәғни дини тәрбиә темаһына төрлө вәғәздәр һөйләй. Был юлы имам ир-егеттәргә: -Ҡатындарығыҙҙы ваҡыты-ваҡыты менән маҡтап тороғоҙ, улар әҙерләгән аш-һыуҙы тәмле булыуын белгертегеҙ,--тип әйткән. Ирем өйгә ҡайтҡас, тәмле итеп ашап алды ла имам ҡушҡансалыр инде, ризыҡ шул тиклем тәмле булыуын белгертте. Быны ишеткәндән һуң түгелеп иларға керештем. -Нимә булды ул? Маҡтап торам даһа? Был юлы иҫ киткес тәмле бешергәнһең...

-Быға ҡәҙәр нисек кенә тырышһам да, нисек кенә тәмле-татлы бешерһәм дә бер тапҡыр ҙа мин бешергән ризыҡты маҡтаманың. Бөгөн күрше: “Күп итеп бешергәндә ҡуйғанмын, ашарға кеше юҡ”, - тип йылы аш индергәйне, шуға рәхмәттәр әйтәһең...

Хәҙер иремә тамаҡ оҡшаһа, күрше инмәгәндер ул, тип әйтә. Ул уның тәмле тигән һүҙе. Миңә ни шул ғына етә, юҡ был юлы үҙем бешерҙем, тырыштым, - тигән булам.

Автор:Гульдар Кадаева