Юбилейын билдәләне Арҡайым

Ер участкалары алып, унда шәхси йорт һалып, торлаҡ шарттарын яҡшыртырға теләүселәр күбәйгәс, 1993 йылдың көҙөндә ҡала хакимиәте ит комбинаты биләмәһендә 250 гектар ер бүлеү хаҡында ҡарар сығара. Яйлап эштәр көйләнә, 1996 йылда ҡаланың көньяҡ-көнбайышына табан 7 саҡрым алыҫлыҡта ятҡан тау итәгендә тәүге йорттар ҡалҡып сыға башлай. Ҡасабаға беренселәрҙән булып Хабиловтар, Дәминдәровтар, Әсәҙуллиндар күсеп килә. Төҙөлөш эштәре алып барған осорҙа вагончиктарҙа, палаткаларҙа йәшәүселәр бик күп була. Йәш ҡасабаға инженер селтәрҙәре килгәнсе, кешеләр кәрәсин лампалары тоҡандырып, шишмәләрҙән, Һеңрән ауылынан һыу ташып, мейестәргә утын яғып көн итә. 1996 йылда Арҡайымға автобус йөрөй башлағанда йүнле юлдар ҙа булмай. 1998 йылда ғына ҡырсынташтан үҙәк урамға юл һалына. Тағы бер йылдан иһә урамдарға электр уты һуҙыла башлағас, урында төҙөлөш ныҡлы йәнләнә һәм шәхси йорттарға күсеүселәр һаны ҡырҡа арта. Шул йылдарҙа Баймаҡ районының төпкөлдә ятҡан Ишей ауылынан бик күп ғаиләләр күсенә. Эргә-тирәләге Моҡас, Әхмәр, Төркмән, Басай, Күсей ауылдары йәштәре лә ҡалаға яҡыныраҡ йәшәргә теләп, Арҡайымға килеп һыйына. Башта урамдарҙа бәләкәй генә усаҡлыҡтар хасил булһа, хәҙер инде ҡасабаның береһенән-береһе яңғырауыҡлы атамалы 23 урамын мөһабәт йорттар биҙәй.

Бөгөн 20 йыллыҡ тарихы булған Арҡайым ҡасабаһында 3500 кеше йәшәй. Халыҡтың көнитмеше яҡшы: газ, һыу, электр уты, Интернет селтәре үткән, юлдарға асфальт түшәлгән. Башланғыс мәктәп-балалар баҡсаһы, китапхана, магазиндар гөрләп эшләп тора. Былтыр «Әбү-бәкир Әс-Ситдыҡ» мәсете үҙ ишектәрен асты.

Үткән аҙнала ҡасаба халҡы түңәрәк дата уңайынан ҙур байрам ойошторҙо. Арҡайымдарҙы Сибай ҡала хакимиәтенең социаль мәсьәләләр буйынса урынбаҫары Г.Ә.Ишемғолова, ҡала Советы депутаты F.Ә.Хәсәнов, мәғариф бүлеге начальнигы F.Ә.Хәсәнов, мәҙәниәт бүлеге начальнигы вазифаһын башҡарыусы Э.F.Кирәйева, территориаль йәмғиәт совет рәйесе Р.Х.Иванова тәбрикләне. Ҡунаҡтар иман йортонда, үҙәк ҡала китапханаһының Арҡайымдағы 7-се филиалында, башланғыс мәктәп-балалар баҡсаһында булды. 2011 йылдың көҙөндә асылған белем усағында 120 уҡыусы уҡый, балалар баҡсаһына барыһы 90 бала йөрөй. Методист М.З.Юнысова етәкселегендәге ижади төркөмгә ингән уҡытыусылар, тәрбиәселәр ҡасабаның үҫеш тарихын өйрәнеү буйынса тикшеренеү эше йәйелдергән. Нурсилә Ишбирҙина етәкләгән китапхана белем һәм мәҙәниәт үҙәге булып тора.

Байрам көндө мәктәп ихатаһында йәрминкә гөрләне. Бина эсендә иһә ҡул эштәре оҫталарының күргәҙмәһе (һүрәттә) һәр кемдең иғтибарын йәлеп итте. Спорт залда төрлө ярыштар уҙҙы. Ҡаланың «Ел» ат-спорт клубы етәксеһе Резеда Латыпова бала-сағаны атта йөрөтөп ҡыуандырҙы.

Сарала Гүзәл Әхмәт ҡыҙы Ишемғолова бер төркөм хеҙмәт алдынғыларына ҡала хакимиәтенең Рәхмәт хаттарын, Почет грамоталарын тапшырҙы. Шунда уҡ Рәсәй почтаһының Сибай бүлексәһе хеҙмәткәрҙәре гәзит-журналдарға яҙылыу, викторина ойошторҙо, приздар уйнатты. Арҡайым ҡасабаһына арымай-талмай гәзит, хат ташыусы Эльвира Муллағәлина иң күп гәзит яҙҙырыусыларҙы махсус бүләктәр менән билдәләп китте. Арҡайымдарҙы «Йәнгүҙәй», «Миләш» ансамблдәре, балалар ижади коллективтары матур сығыштары менән ҡыуандырҙы. Урындағы үҙешмәкәрҙәр көсө менән әҙерләнгән концерт та һәр кемдең күңеленә хуш килде. Айырыуса «Аҡбуҙат» балалар баҡсаһы хеҙмәткәрҙәренең Кино йылына бағышланған Чарли Чаплин бейеүе арҡайымдарға һәм ҡунаҡтарға байрам кәйефе өҫтәне.

Сарала сығыш яһаған балаларҙың һәләттәрен күреп, урында йәш ғаиләләр күпләп йәшәүенә ҡыуанып, Арҡайым халҡының дәртлелегенә, киләсәгебеҙҙең өмөтлө булыуына инанып ҡайттыҡ.