ТЫНЫС ЙОҠЛА, ФӘНИС...

Башҡортостан Башлығы яугирҙең әсәһенә генерал Шайморатов орденын тапшырҙы.

Бөгөн Тәтешле районының Үрге Тәтешле ауылында махсус хәрби операция зонаһында үҙ бурысын үтәгәндә һәләк булған кесе сержант Фәнис Хөсәйенов менән бәхилләштеләр. Ул «Барыҫ-17» ирекле батальонында хеҙмәт иткән.

Матәм сараһында Башҡортостан Башлығы Радий Хәбиров, район хакимиәте, хәрби комиссариат вәкилдәре, яугирҙең туғандары, яҡындары һәм дуҫтары ҡатнашты.

«Хөрмәтле Фәриҙә Мәғҙән ҡыҙы, туғандары һәм яҡындары, тәтешлеләр. Махсус хәрби операцияла меңәрләгән ир-егеттәребеҙ ҡатнаша, илебеҙҙе һаҡлай, ҡаһарманлыҡ күрһәтә. Фәнис Хөсәйенов ирекле батальонға тәүгеләрҙән булып яҙылды, яуҙа яраланды, ҡыйыу һуғышты. Беҙ уның батырлығы тураһында беләбеҙ һәм бер ҡасан да онотмаҫбыҙ. Ҡыҙғанысҡа ҡаршы, ул һәләк булды. Хөрмәтле Фәриҙә Мәғҙән ҡыҙы, һеҙ бик яҡшы ул, ысын илһөйәр һәм яугир үҫтергәнһегеҙ. Ныҡлы вәғәҙә бирәм, исеме мәңгелеккә беҙҙең хәтерҙә ҡалыр, йәш быуынды уның өлгөһөндә тәрбиәләрбеҙ. Уның юлы еңелдән булманы, ләкин ул - ысын герой. Район хакимиәтенән Фәнис Хөсәйеновтың исемен мәңгеләштереү буйынса саралар күреүҙәрен һорайым. Тыныс йоҡла, герой, мәңгелек дан һиңә», — тине Радий Хәбиров.

Башҡортостан Башлығы яугирҙең әсәһенә генерал Шайморатов орденын тапшырҙы. Фәнис Хөсәйенов хәрби бурысын үтәгәндә күрһәткән ҡаһарманлығы өсөн был орден менән үлгәндән һуң бүләкләнгәйне.

Автор:Резеда Валиева

Читайте нас: