Асҡар ҡартәсәһенән йөн ойоҡ бәйләткән

Сибай ҡалаһының 7-се мәктәбенең 3-сө кадет класында уҡыған Асҡар Нәҙершин ҡартәсәһе Гәүһәр Буранованан йөн ойоҡ бәйләткән. 9 йәшлек малай ҡалала мобилиацияланған яҡташтарға, алғы һыҙыҡтағы хәрбиҙәргә ярҙам итеү маҡсатында гуманитар ярҙам йыйылыуын ишеткәс тә ҡартәсәһенә йүгергән. -Һинең бит ҡулыңдан килә, зинһар, тиҙ генә йөн ойоҡ бәйлә инде,--тип үтенгән ул. Мәғариф ветераны, Рәсәй Федерацияһының мәғариф алдынғыһы Гәүһәр Дәүләтша ҡыҙы ейәнең һүҙен йыҡмай: һарайында Урғаҙанан алып ҡайтҡан бер тоҡ йөн ятыуын иҫенә төшөрөп, уны индереп, тетеп, иләп, йөн ойоҡ бәйләй. Етмәһә, яҡын ғына туғандары ла алғы һыҙыҡта булыуын белә. -Ул мобилизацияланғанда 6 айлыҡ ауырлы ҡалған ҡатыны Белоретта өсөнсөгә бәпәй табып ята. Бәпес апайына, ағайына иш булып үҫеп китһен! Атаһы тиҙерәк ҡайтып сабыйын ҡулына алып ҡыуынһын инде! – тип Аллаһы Тәғәләнән һорай Гәүһәр апай.

Һөҙөмтәне күргәс, ейәне тағы ла ҡыуана һәм улар икәүләшеп йылы әйберҙе ҡаланың М.Шайморатов исемендәге штабҡа алып барып тапшыра. Ябай ғына миҫал, шулай ҙа күпме мәғәнә ята. Кеше ҡайғыһына битараф булмаған, донъяла тиҙерәк тыныслыҡ урынлашыуын теләгән малай үҫеп килеүе ҡыуаныслы.

-Улдарыбыҙ иҫән-һау әйләнеп ҡайтһын! Мәғәнәһеҙ ҡанҡойоштар тиҙерәк туҡтаһын! - ти Гәүһәр Дәүләтша ҡыҙы.

Афарин, Асҡар! Афарин, Гәүһәр Дәүләтша ҡыҙы!

Автор:Гульдар Кадаева