Бүләккә—татлы гөлләмә

Айгөл—дүрт бала әсәһе. Уңған хужабикә, һөйөклө ҡатын. Бухгалтер һөнәрен үҙләштереп, тырышып эшләп йөрөй. Эш, ғаилә, өй тип өҙгөләнгәндә яратҡан шөғөлөнә лә ваҡыт таба.

— Бының менән дүрт йыл элек булыша башланым. Байрам етһә, яҡындарға, туғандарға ниндәй бүләк бирергә тип баш ватаһың. Күҙ өйрәнгән, йыш бүләк ителгән әйбер алғы килмәй. Бер мәл әхирәтем кәнфиттәрҙән гөлләмә эшләргә тәҡдим итте. Тәүҙә аптырауға ҡалдым. Ул кәнфиттән ниндәй гөлләмә сыҡһын инде ул?! Ҡайтып Интернетты асып эҙләргә тотондом. Ундағы мәғлүмәттең күплеге! Төрлө оҫталыҡ дәрестәрен ҡарап өйрәнә башланым. Өс көн тормаҫтан ултырҙым. Ул ваҡытта материалдарҙың булмауы ҡыйынлыҡ тыуҙырҙы. Интернет селтәрендә ҡыҙҙар күрһәткән ҡағыҙҙар, биҙәү элементтары, туҡымаларҙы үҙебеҙҙә табыуы ҡыйын ине. Аптырағас заказ биреп, ҙур ғына сығымдар түгеп Екатеринбург ҡалаһынан кәрәкле әйберҙәр алдым. Шулай эшем башланып китте. Иремә рәхмәтлемен, һәр башланғысымды ҡарап дәртләндереп, ҡеүәтләп торҙо. Үҙ эштәремдә тик яҡшы, ҡыйбатлы «Коркунов», «Rafaello», «Ferrero Rocher» кәнфиттәре ҡулланырға тырышам.

Үҙем күңел йылыһы ҡушып, ҡулдан эшләнгән бүләктәргә өҫтөнлөк бирәм. Шуға ла ҡайҙа йөрөһәм дә яҡындарымдың байрамына кәнфиттәр гөлләмәһен тотоп бара инем. Яратып ҡабул иттеләр. Тора-бара заказға эшләүемде һорап мөрәжәғәт итеүселәр күбәйҙе. Эште яйға һалып алғас, «Бәйләнештә» селтәрендә үҙ битләүемде асып, эштәремдең фотоһүрәттәрен шунда һалдым. Бында инде ҡаланан ғына түгел, башҡа ерҙәрҙән дә заказдар килде. Яйлап гөлләмәләр генә түгел, төрләндереп, байрамына ҡарап башҡа әйберҙәр ҙә эшләй башланым. Минең коллекциямда яңы йылға шыршылар, сәғәттәр, биҙәлгән шараптар, кәнфиттән эшләнгән виноград суҡтары, гөлләмәләр бар. Хәҙерге көндә магазиндарҙа материал күп, кәнфиттәрҙең ниндәй генә төрө юҡ. Эшлә генә. Ә шулай ҙа илдә барған көрсөк үҙен һиҙҙерә. Кешегә матур, шул уҡ ваҡытта арзаныраҡ бүләк кәрәк. Шунлыҡтан осһоҙораҡ кәнфиттәрҙе лә ҡулланышҡа индерҙем. Fөмүмән, һәр кем үҙ кеҫәһенә, мөмкинлектәренә ҡарап заказ эшләй ала,—ти Айгөл.

Ысынлап та, кәнфиттәрҙән эшләнгән гөлләмәләр бәйләме һәр кемдең күңеленә хуш килер. Яҡындарығыҙҙы ҡыуандырырға теләһәгеҙ, Айгөлгә мөрәжәғәт итегеҙ. Бында балаларға ла, өлкәндәргә лә, ҡатын-ҡыҙҙарға, ир-егеттәргә тәғәйенләнгән бүләктәрҙе табырға була. Әйткәндәй, был үҙенсәлекле гөлләмәләр һулымай һеҙҙе оҙаҡ һөйөндөрөп торасаҡ, кәнфиттәрен алып ашаған хәлдә лә, улар үҙ формаһын һаҡлаясаҡ.