МЕҢ СИРГӘ ДАУА

Ул елһенеүҙе, йәрәхәттәрҙе бөтөрә. Бынан тыш, тырнаҡ гөл (календула) күп кенә башҡа ауырыуҙарҙы дауалай.

Һалҡын тейгәндә, гипертония, йөрәк-ҡан тамырҙары ауырыуҙары, ашҡаҙан һәм эсәк йәрәхәте, гастрит булғанда 1 аш ҡалағы тырнаҡ гөл сәскәһен 1 стакан ҡайнар һыуға һалып, бер сәғәт төнәтәләр. Көнөнә 3 мәртәбә 1-әр аш ҡалағы эсәләр.

Ҡорһаҡ ҡыуышлығында һары һыу йыйылғанда 10 г кипкән сәскәне 1 стакан һыуға һалып, 5 минут ҡайнаталар һәм 2 сәғәт һайын 1-2 аш ҡалағы эсәләр.

Тырнаҡ гөлдән яһалған май (мазь) йәрәхәтте яҡшы дауалай. Үләндең яңы һығылған һутын 1:10 нисбәтендә сусҡаның эс майына һалып болғаталар һәм ҡулланалар.

Ашҡаҙан һәм эсәктә йәрәхәт булғанда 1 сәй ҡалағы сәскәне 200 мл ҡайнар һыуға һалып, 30 минут төнәтәләр. Һөҙөп, көн дауамында аҙ-аҙлап 400 мл күләмендә эсәләр.

Ауыҙ эсе боҙолғанда 1 сәй ҡалағы сәскәне 200 мл ҡайнар һыуға һалып төнәтәләр. Һөҙөп, йылы килеш ауыҙға ҡабып торалар.

Невроз, гипертония, атеросклероз, стенокардия, аритмия, гепатит, талаҡ, бауыр һәм үт ҡыуығы ауырыуҙары борсоғанда 2 сәй ҡалағы кипкән календула сәскәһен 2  стакан ҡайнар һыуға һалып, 15 минут төнәтәләр. Һөҙөп, көнөнә 4  тапҡыр бер-ике стакан эсәләр.

 Ангина, ларингит булғанда, тамаҡ төбөн сайҡау өсөн 4 аш ҡалағы кипкән сәскәне 2 стакан ҡайнар һыуға һалып 15 минут ҡайнаталар. Бер аҙ һыуынғас, һөҙөп ҡулланалар.

Ҡатын-ҡыҙ ауырыуҙары ваҡытында һиптереп йыуыныу һәм урт сирҙәре мәлендә, пародонтоз күҙәтелгәндә ауыҙ эсен сайҡатыу өсөн 1 сәй ҡалағы үләнде 1 стакан ҡайнар һыуға һалып, һыуынғансы төнәтәләр.