Бөтә яңылыҡтар
Ҡала тормошо
29 Август 2022, 18:55

Сибайҙа күп фатирлы йорттарҙа йәшәүселәр йыйын уҙғарҙы

Республика Башлығы ҡушыуы буйынса Сибай ҡалаһының Балалар ижады үҙәгендә “Управдом” муниципаль форумы ойошторолдо. Уны рәйес булараҡ ҡала хакимиәте башлығы Азамат Юлдашбаев алып барҙы. Сарала Башҡортостан Республикаһының торлаҡ һәм төҙөлөштө күҙәтеү буйынса дәүләт комитеты вәкилдәре, күп фатирлы йорттар советы рәйестәре һәм ағзалары, ресурстар менән тәьмин итеүсе ойошмалар һәм идарасы компаниялар ҡатнашты.

Сибайҙа күп фатирлы йорттарҙа йәшәүселәр йыйын уҙғарҙы
Сибайҙа күп фатирлы йорттарҙа йәшәүселәр йыйын уҙғарҙы

Йыйылыш башында унда ҡатнашыусыларҙы Рәсәй Федерацияһы Хөкүмәтенең коммуналь хеҙмәттәр күрһәтеү һәм күп фатирлы йорттарҙа дөйөм мөлкәтте ҡарау буйынса мәсьәләләр ҡарарына индерелгән үҙгәрештәр менән таныштырҙылар. 1 сентябрҙән ғәмәлгә инәсәк яңылыҡтарға ярашлы, күп ҡатлы йорттарҙа дөйөм мөлкәт, атап әйткәндә һыу, йылылыҡ торбалары һәм башҡа инженер селтәрҙәрен хеҙмәтләндереүгә коммуналь ресурстарға түләүҙәр үҙгәрәсәк.
Форумда ҡаланың күп фатирлы йорттары советтары рәйестәре әүҙемлек күрһәтте. Уларҙың күбеһе халыҡты борсоған мәсьәләләрҙе күтәрҙе. Әйтәйек, ямғыр һыуҙарын ағыҙыу канализациялары, йорт яны ихаталарына асфальт түшәү, ҡайһы бер кварталдарҙа балалар майҙансығы юҡлығы бәйән ителде. Хакимиәт вәкилдәре, идарасы компаниялар етәкселәре барлыҡ үтенестәрҙе яҙып алды һәм уларҙы киләсәктә ыңғай хәл итергә вәғәҙә бирҙе.

Әйткәндәй,

2023 йылдан республикала торлаҡ-коммуналь хеҙмәттәр өсөн бурыс йортта йәшәүселәр араһында бүленә

Рәсәй Хөкүмәтенең 2022 йылдың 3 мартындағы 92-се ҡарарына ярашлы, киләһе йылдан торлаҡ-коммуналь хеҙмәттәр өсөн түләмәгәндәрҙең бурысы күршеләр араһында бүленә.

Яңылыҡ дөйөм йорт иҫәп-хисап приборҙары булған коммуналь ресурстарға ҡағыла, тип өҫтәне эксперттар.

Сибайҙа күп фатирлы йорттарҙа йәшәүселәр йыйын уҙғарҙы
Сибайҙа күп фатирлы йорттарҙа йәшәүселәр йыйын уҙғарҙы
Автор:Гульдар Кадаева