Бөтә яңылыҡтар
Атайсал
5 Декабрь 2022, 10:05

Йыуаса бешерәйек

Бәләкәйҙән майикмәкте (Баймаҡ яғында йыуасаны шулай йөрөтәләр) яратып үҫтем мин. Әсәйем уны һәр саҡ сөсө ҡамыр менән дә, икмәктән тороп ҡалған ҡамырҙан да бешерҙе.Яңы һауылған һөт йә май, ҡаймаҡ менән ҡушып ашаған йыуасаға нимә генә етһен инде!Әле булһа йыуасаны яратам. Балаларым да бешергәнде көтөп кенә тора.

Йыуаса бешерәйек
Йыуаса бешерәйек



Ә рецебы минең ошолай: 1-2 стакан әсегән һөт йә кефирға 0,5 балғалаҡ аш содаһы ҡушып, күпергәнсе болғатам. Аҙаҡ уға 1 йомортҡа, әҙерәк көнбағыш майы, сама менән тоҙ, шәкәр, иләнгән он ҡушып, ҡамыр баҫам. Бөтә ингредиенттар бүлмә температураһында булырға тейеш. Әҙер ҡамырға ял биреп алам. 20-30 минут етә.

Ә һуңынан үҙем теләгән ҙурлыҡта, формала йыуасаны эшләп, майҙа ҡыҙҙырып алам. Бер ыңғайы сәйем дә ҡайнап сыға. Булды, ҡабарып бешкән йыуасалар әҙер. Сәйҙәрегеҙ тәмле булһын! ☕

Ә һеҙҙә йыуасаны нисек атайҙар? Яҙығыҙ ⤵️

Автор:Гульдар Кадаева